’n Groep van sewe PhD-studente en vier lektore van die Universiteit van Minnesota in die VSA se Department: Toegepaste Ekonomie besoek tans die UV.  ’n Ooreenkoms van voorneme is in 2000 tussen die twee universiteite gesluit en is in 2008 vir ’n verdere ses jaar hernu. Hoofrolspelers was prof. Klopper Oosthuizen van die Departement Landbou-ekonomie, prof. Herman van Schalkwyk, dekaan van die Fakulteit Natuur- en Landbouwetenskappe, en prof. Claudia Parliament van die Universiteit van Minnesota.

Die doel van die besoek is om skakeling in die landbou-ekonomiese veld tussen personeel en studente van die twee universiteite te vestig met die oog op verdere samewerking en besoeke. Nagraadse studente van beide universiteit het hulle navorsing voorgelê om interdissiplinêre navorsingsbesprekings aan te moedig en om die vlak van navorsingsgehalte te verhoog.

Die groep het op Maandag 25 Mei in Bloemfontein aangekom en toer tans saam met personeel en nagraadse studente van die Departement Landbou-ekonomie deur die Noord-Kaap en Oos-Vrystaat. Verskeie agribesighede en projekte vir opkomende boere gaan besoek word om meer te leer oor die toestand en uitdagings van landbou. Die doel van die ondervraging aan die einde van die besoek is om ’n gesamentlike navorsingsagenda te ontwikkel.