(Editorial - Afrikaans)
Dinsdag 13 Februarie 2007
Hoofartikelblad
Transformasie-resep
DIE transformasieproses in Suid-Afrika kan vooruitgang pootjie as dit nie reg aangepak en deurgevoer word nie.
Anders gestel: 'n Onbekookte, ondeurdagte proses kan soveel skade aanrig dat dit die land jare gaan neem net om weer op die been te kom.
Dit is hierdie slaggate waarteen prof. Adam Habib, direkteur van demokrasie en regering by die RGN, waarsku. Transformasie in die hoër onderwys is hier ter sprake, maar belangrike lesse is ook vir die res van die staatshuishouding te leer.
Habib het op 'n gespreksgeleentheid op die Wits-kampus gesê universiteite kan binne 10 tot 15 jaar sterf as niks gedoen word om nuwe, jong akademici van gehalte te werf nie. In hul poging om te transformeer en "swart boude op sitplekke te kry" het universiteite so agtergeraak met hul doelwitte dat hulle nou selfs van swakker gehalte is as vroeër. "Speletjies" word met transformasie gespeel en 'n "malheid" rondom syfers is aan die gang.
Instellings fokus so daarop om hul kwota-mikpunte te bereik, sê die professor, dat dienslewering en kundigheid die kreeftegang gaan. "So kry 'n mens 'n situasie waar die adjunk-president dan aankondig sy moet Indië toe gaan om vaardige mense te kry."
'n Mens kan net hoop dat hierdie waarskuwings op die regte ore val.
Transformasie is nodig, maar beslis nie tot elke prys nie.
Dit kan die hoëronderwys-sektor loon om te kom kyk waarheen die Universiteit van die Vrystaat met sy Institusionele Manifes op pad is.
Die manifes, tans nog 'n besprekingsdokument, gaan die transformasieproses van die UV rig met as einddoel 'n instelling waar alle Suid-Afrikaners plek sal hê en tuis sal voel, maar waarin kernwaardes soos akademiese gehalte en die volgehoue versterking van kernbevoegdhede en -vermoëns ononderhandelbaar is.
Dit is sekerlik die enigste pad na transformasie-welslae wat Suid-Afrika kan en moet loop.