Nols Nieman - Volksblad
DIE eerste opera op die Volksbladkunstefees, 'n konsert van klavierduette deur die vermaarde pianiste Albie van Schalkwyk en Anneke Lamont, drie konserte deur die Nasionale Jeugsimfonie-orkes en 'n uitvoering deur die bekende Rosamundestrykkwartet.
Dit is van die hoogtepunte wat vir liefhebbers van klassieke musiek op die Volksblad-kunstefees van 12 tot 17 Julie in Bloemfontein beplan word. Op 'n kunstefeesvergadering gister op die kampus van die Universiteit van die Vrystaat (UV), het mev. Doks Briers, hooforganiseerder, bekend gemaak dat die Nasionale Jeugsimfonie-orkes drie konserte gaan hou, waarvan twee volle simfoniekonserte gaan wees. Dié orkes hou tydens die fees 'n kamp op die Kovie-kampus.
Me. Hanna van Niekerk, sangdosent en konsertkoördineerder van die departement musiek aan die UV, het gesê die plan is om die sprokie-opera Hansie en Grietjie van Humperdinck in die Odeion op die kampus aan te bied. Die Skool vir Musiek in Potchefstroom van die Noordwes-universiteit onder leiding van Werner Nel voer dit uit.
Ook word 'n konsert deur die Rosamunde-strykkwartet beplan. Van Niekerk beskou Rosamunde as die beste strykkwartet in die land. Die vier vroue in die kwartet is Denise Sutton (viool), Suzanne Swanepoel-Martens (viool), Jeanne-Louise Moolman (altviool) en Marian Lewin (tjello)
Die beplande konsert van klavierduette deur Van Schalkwyk en Lamont behoort ook 'n vol saal te trek.
Volksblad - Woensdag 23 Februarie 2005