Membra Jesu nostri – Buxtehude (1637 – 1707)
 

Membra Jesu nostri patientis sanctissima (Die allerheilige liggaam van die lydende Jesus aan die kruis) deur Buxtehude het die Kruisiging van Jesus as tema.

Die uurlange werk word in Latyn gesing en handel in elk van die sewe dele oor ‘n deel van Jesus se liggaam aan die kruis: voete, knië, hande, die sy, bolyf, hart en gesig. Voices Inc – Kovsie kamerkoor word bygestaan deur die Odeion Strykkwartet met Francois Henkins, Abrie de Wet, John Wille en Michaela Haller. Die kontrabas word deur Alba Henkins-Molller bespeel en Jan Beukes is die orrelis.

Die woorde in Latyn wat buitengewoon was vir ‘n werk deur Buxtehude, is geneem uit die Latynse Bybel (Vulgate) en van die Rhytmica Oratio Sancti Bernadi, ‘n strofiese gedig deur St Bernard van Claivaux (c1090 – 1153).

Die wyse waarop Jesus se pyn aan die kruis uitgebeeld word asook die gebed en uitroep van versoening tussen God en die mensdom was deel van die Piëtiste se oortuigings van die tyd.

Die werk is saamgestel uit sewe afsonderlike dele wat telkens deur ‘n instrumentale sonate aangekondig word. Die koor lui die vokale bydrae in en sluit elke deel ook af. Die res van die werk bestaan uit verskillende groeperings van solo’s en trio’. Interessante vokale kombinasies kan gehoor word, bv. twee soprane en bas asook sopraan, alt en tenoor.

Hierdie opwindende aanbieding van Membra Jesu nostri, ‘n juweel uit die Baroktydperk, word aangebied deur ‘n groep energieke studente van Kovsies. Die jeugdige klank van die soliste – almal studente aan die Universiteit van die Vrystaat - dra by tot die egtheid van die Barok-klank. Die koor staan onder leiding van Leona Geldenhuys, dosent in Koorleiding aan die UV.

Optreedatums in die Moederkerk op Oudtshoorn. is:

• Vrydag 25 Maart om 19:00
• Saterdag 26 Maart om 13:00
• Sondag 27 Maart om 19:00
• Maandag 28 Maart om 16:00
• Dinsdag 29 Maart om 10:00

Toegang is R50,00