Kom kyk gerus na Elisabeth Eybers se Eeujaarherdenking-uitstalling met die titel 'Literêre dubbelburger: Ons digteres aan die grag', met subtitel: 'Pionier, tussenfiguur en ikoon' in die NALN-ouditorium.

’n Beduidende deel van Eybers se tasbare nalatenskap is onlangs uit Zuid-Afrika Huis in Amsterdam na Suid-Afrika verskeep, waar dit nou by NALN uitgestal word.

Besoektye: Maandag-Vrydag 08:00-16:00. H.v. Elizabeth- en Pres Brandstraat, Bloemfontein

Maria Zebroz 75

"‘n Engel het dit self gebring, die vreude-boodskap – en jy het ‘n lofsang tot Gods eer gesing, Maria, nooi uit Nasaret!

Maar toe Josef van jou wou skei en bure-agterdog jou pla, het jy kon dink, eenmaal sou hý die hele wêreldskande dra?

Toe jy soms met ‘n glimlag langs jou liggaam stryk … die stilte instaar… wis jy met hoeveel liefde en angs sou hý sy hellevaart aanvaar?

Die nag daar in die stal – geeneen om in jou nood by jou te staan – het jy geweet dat hý alléén Getsemane sou binnegaan?

Toe vorste uit die Ooste kom om nederig hulde te betoon, wis jy hoe die soldate hom as koning van die volk sou kroon?

En toe hy in jou arms lê, sy mondjie teen jou volle bors, het jy geweet dat hy sou sê, toe dit te laat was: Ek het dors?

Toe dit verby was en jy met sy vriend Johannes huis toe gaan – Maria, vrou van smarte, het jy tóé die boodskap goed verstaan?"

'Belydenis in die skemering'/Eybers, Elisabeth. – Kaapstad: NBB. 1936; 1957.

Kamphoer

Francois Smith, dosent in die Departement Afrikaans en Nederlands, Duits en Frans, se roman, Kamphoer, is op die kortlys van twee letterkundepryse, naamlik die WA Hofmeyr-prys en 'n Tempo-toekenning. Die WA Hofmeyr-prys word jaarliks toegeken vir Afrikaanse fiksie wat die betrokke jaar deur Media24 Boeke uitgegee is.

Die volgende boeke is saam met Kamphoer benoem: Buys: ’n grensroman deur Willem Anker, Ester deur Kerneels Breytenbach en ’n Duisend stories oor Johannesburg deur Harry Kalmer. Die wenner word op 5 Junie aangekondig. Een van die tydskrif Huisgenoot se jaarlikse Tempo-pryse gaan aan die 'Afrikaanse leesboek van die jaar'.

Vanjaar is Kamphoer saam met vyf ander boeke op die kortlys. Die ander benoemdes is: Vermis op Allesverloren deur Anchien Troskie, Die Respektabele Meneer Hartslief deur Chris Karsten, Ikarus deur Deon Meyer, ’n Duisend Stories oor Johannesburg deur Harry Kalmer, en Ester deur Kerneels Breytenbach. Die wenner word op 10 Junie aangekondig.

Die skrywer van Kamphoer

Izak de Vries se foto van Francois Smith, dosent in Kovsies se Departement Afrikaans en Nederlands, Duits en Frans, met sy optrede by die pas afgelope Stellenbosse Woordfees. Die byskrif by Izak se foto lui: Francois Smith, die skrywer van Kamphoer , is soos ’n rockster ontvang. Huisgenoot se boekeredakteur, Elna van der Merwe, het in die Boeketent, die Woordfees se lokaal vir skrywersoptredes, 'n onderhoud met Francois gevoer.

Fifty Shades of Grey

Niks minder nie as 'n vuurwarm debat, dit is wat 'n seminaar oor die boek en film Fifty Shades of Grey beloof het, en dit is wat dit opgelewer het. Die seminaar met die titel Wie swaai die sweep? is op 27 Februarie gesamentlik deur die Departement Afrikaans en Nederlands, Duits en Frans en die Departement Filosofie aangebied. Die sprekers was dr Kate Law van die Sentrum vir Genderstudies, dr Johann Rossouw van die Departement Filosofie, dr Francois Smith van die Departement Afrikaans en Nederlands, Duits en Frans en me Dionne van Reenen van die Instituut vir Versoening en Sosiale Geregtigheid. Van die kwessies wat aangeroer is, was:

• Is Fifty Shades of Grey ’n nuwe pleidooi vir vroulike bevryding of vroulike verslawing?
• Wat sê Fifty Shades of Grey oor gender- en magsverhoudinge tussen man en vrou?
• Is Fifty Shades of Grey vir of teen die belange van die eietydse kapitalisme?
• Waarom is Fifty Shades of Grey so gewild?